星期二, 5月 10, 2005

農夫《鄭永芝》:好好笑

當然,「鄭永芝」不是歌星的名字,「鄭永芝」不會和我心愛的王菀之爭奪今年的新人獎。這是一隊本地Hip-Hop組合「農夫」的新唱片名。「鄭永芝」其實就是農夫其中三位成員:鄭詩君(C君)、陸永和聶碧芝(Gigi)的名字湊合而成。

講到粵語Hip Hop或Rap可能會想到以前的LMF,和LMF的不同之處就是農夫沒有粗口、沒有控訴、沒有怒罵,用幽默的諷刺手法,針對社會問題,發人深省之外也聽得十心暢快。

這張唱片表面上有八cut,其實只有五首歌(不計「boom枝筆」),但是放到CD機播放卻其實有12 cut,因為當中收錄了幾首hidden track,是幾首歌的MMO版本。

「農夫係你老死」講都市人的感情疏離和普遍人愛批評愛鬧卻羞於讚美他人和釋放善意,「跟隊唔該」講籃球場上的眾生相,巧妙地在副歌借用了周杰倫的「鬥牛」,兩首歌都在電台播過不少,也在他們的Live Show表演過很多次。「菩提本無異」是又一首反省Hip Hop潮流的歌,同類的歌曲DJ Tommy和LMF都做過,但今次在歌詞上有一種「內鬨」的意味,編曲上的中樂也是得意的地方。「TEEN POWER奧運會」模仿奧運主持現場直播(但是仍然是Rap,你可以聯想到韓毓霞和江嘉良Rap住直擊奧運嗎?),講的是城市中各種光怪陸離的現象。「十七年華」講倫常慘劇和諷刺傳媒,中間一大段歌詞和報紙新聞幾乎無異,究竟如何張新聞用Hip Hop演繹?聽了他們的歌,一定會為他們的創意而佩服。

講創意不能不提他們的歌詞,農夫最擅長運用押韻和食字,寫出來的詞總讓人意想不到,聽到必定回心微笑。節錄幾段我覺得寫得特別精彩的歌詞:

「波 有乜理由咁打 阿哥 整乜你又咁渣
打波 準備跟住我o地兩個 One Two Three Four
睇見你個身形 搞到我有個心情
你打相撲好過打波 我唸你係分明 Ricky Martin再加貴花田
o係籃底震 震 震 又要un un un 仲要boom boom boom…

我見到一班低B哩 以為自己打緊NBA
(Hey) 人伸利你又伸利 但係就伸到好似迪士尼隻高飛
你d衫好多廿三 (扮晒係MJ) 其實都OK 如果你落波地學咖妹玩cosplay

佢插花 有點兒那個 一字箝羊馬咁款 我係咪睇緊彭丹籌款
你不停咁walking都唔認 我仲唔介紹佢用腳癬靈

我矮過你 但係我快過法拉利 我高到痺 人o地叫我入樽機器
農夫一浪接一浪 簡直球壇盛況新人王
我有古銅o既膚色 我有古龍o既招式…」 (跟隊唔該)

「C君:我問d街坊街里點樣可以去到奧運
佢o地好認真答我o係中環轉車比較接近
點知o係金鐘已經feel到d比賽氣氛
幾百個人短途賽跑爭一個冠軍
o係呢邊衝到過去 o個邊車廂鬥快達陣
o係嘟嘟嘟聲過去 呢幅快相決定命運
邊一個贏 邊一個輸 而家鏡頭拎轉 6wing你o個邊點

陸永:好C君唔該晒 我呢邊o岩o岩落街
條街無人有個老人d行為有d古怪
佢將一張張o既紙張dum落個黑廂 火化
觀眾各位我睇 係奧運聖火o卦
有架紅頂十六座位賽車我就上o左喇
正所謂深入車廂為你捐窿捐罅
個車手好有型 所有紅燈都無停
彎路直路二百幾咪俾佢Cher足全程」 (TEEN POWER奧運會)

「點解同人講聲唔該都咁難 一句唔該做死人又咁閒
鐘意鬼佬唔係唔好 但係細路見到碧咸 係咪會識行 你o地有無色盲
黑色眼珠睇返黃色皮膚o既人就淨係識彈 永遠無話稱讚…

我細細個諗已經獨到又精湛 係咁諗點解D人毒辣又冰冷
唔出聲我o地以前叫「鼓起個腮」 而家D o靚妹反而要「cool d oY再」
係咪新年代 定係一代不如一代 無幾耐 憎恨就會代替o左愛
搞到個社會風氣 D o靚仔都自私到死
唔過o黎兇你 就驚好似洩o左道氣
一大渣油雞鹵味拋過o黎 你係咪好肚餓o者
點解唔講句 做個老死…」 (農夫係你老死)

「本報訊:某中學中三輔導班一名女學生,於昨日晚間被其大廈夜更看更王生發現,倒臥於大廈門口與停車場之間,發現事主時已不省人事,送院救治後證實不治。女死者梁XX,十七歲,在校內成績很差為一名夜歸少女。在家中她是一名獨女,早年喪母與父親同居,身兼母職的父親一向疼愛女兒(你點知)。他昨夜下班時,原想逗女兒歡喜,買了燒鵝脾,豈料未幾,回家已得知女兒尋死」 (十七年華 – 請留意是rap出來的)

最後要提「boom枝筆」,收錄他們在不少live show做過的口技表演,現場聽的時候真的令人嘆為觀止,一把口一邊做beat box一邊唱「帝女花」?這一cut的表演我實在聽過太多次,所以在CD聽就少了一份驚喜。其實碟內很多歌都在很久以前的live show都聽過了,希望出了這一張碟之後,我們可以聽到他們的新作品,和「boom枝筆」的續集。

沒有留言:

發佈留言