星期三, 11月 14, 2007

農夫《風生水起》:屢創新高

耳聽為憑,眼見為準,農夫是一隊非常聰明的組合,農夫也是一隊一張唱片比一張唱片進步,一年比一年進步的組合。

說他們聰明,因為他們寫的歌詞,充滿機智與幽默,運用食字押韻幾近趨於化境,幾乎句句都有估你唔到的驚喜。說他們進步,除了因為他們路線越見清晰,技巧越見成熟之外,更越來越覺得他們像武俠小說所寫的隨手拿起一根樹枝也可成劍的高手,無論是《士多啤梨蘋果橙》、《點解要大家笠》、《激光中》還是《細水長流》(註),都可以抽取精髓轉化成自己的元素;無論是詹瑞文、麥玲玲、陶傑還是陳永陸,都可以做成意想不到的合作,併出新鮮而驚喜的火花。

不計上張專輯精華剪輯而成的《溫故知新》,繼續拿DJ Galaxy的發音開玩笑的《錯中複習》和《智華悶局》,以及《愛似陳冠希》的Remix,一共有十首新歌。點題作《風生水起》最大綽頭是找來麥玲玲師傅獻聲,rap得兩嘴而且聲音嬌俏,的確為歌曲生色不少,拿看錯羅庚事件開玩笑也是令人會心微笑之處。歌詞那點「頒獎典禮裡面,鏡頭唔影呢面」的無病呻吟也只是些少瑕疵吧。《八無禁忌》的八是指八卦,光是加入大戲元素的hip hop音樂聽起來已經叫人驚喜,玩盡圈中好友的歌詞也是抵死之至,最後一段「呃呃騙騙大話連連,篇篇封面段段纏綿」,一針見血地諷刺八卦傳媒作新聞無句真的現象。

《學海無涯》和《日出而作》可謂把學生哥和打工仔一網打盡的兩首歌,前者生動地勾劃出校園生活的點滴,學生哥會感到共鳴,出來做事的人會勾起集體回憶;後者用懶洋洋的音樂表現典型打工仔返工等放工,不喜歡返工但最喜歡人工的心態,堪稱替打工仔發牢騷洩怨氣之作。

《全民皆估》寫全民炒股熱,喜歡「炒股票有賭未為輸,金融風暴已經係歷史」完全表現出學生師奶也入市,老師醫生不務正業的「非理性亢奮」,也喜歡「有對兄弟會借錢」「咪學360郁郁下會停,跌到渣都無得剩」緊貼潮流的幽默。當然最過癮的的莫過於Sample了一段陸叔(股評人陳永陸)講股的片段,連陸叔那些「er…」都可以夾得到跟著拍子走,有趣。

《樂而忘返》把林海峰在《細路哥》講過的「娛樂越來越多,快樂越來越少」發揚光大。無論是劈酒唱K購物,都無法掩飾城市人的空虛寂寞;在節拍強勁的party音樂底下,誰知心裡不是在crying呢?和詹瑞文合唱的《千呼萬喚》主題就是「口不對心」四個大字,詹瑞文由頭帶到尾地演出了一個三分鐘的浮誇劇場。

《一夫當關》是自述,是自嘲,是宣言,也是反擊,是《456Wing》與《ABC君》結合,加上昔日的《菩提本無異》,但今日的農夫,在幽默和火氣的背後,是更純熟的技巧和更強的自信。

最後是兩首solo。《十年人事》C君花了個多月時間走訪不同人對回歸十年的感想之後寫成,加上陶傑用不足十分鐘對原詞略作提點再加料一段歌詞兼親自獻聲,就完成了一篇有血有淚的四分鐘香港特區近代史。廣闊的視野,真實的呈現,再加上沉重氣氛,有著當年軟硬天師寫蘭桂坊慘劇的《最後今天》的影子。勾起大家回憶、感慨、反思的東西實在太多,每一句、每一隻字都值得我們香港人仔細咀嚼。

陸永單拖的《肉麻無罪》更是最大驚喜,絕頂骨痺的歌詞堪稱情場必備範文。陸永喉嚨聲放輕演繹已叫人起雞皮,再加上咖啡因公園(Gary)的深情adlib更是不得了。這段更是極品中的極品:

如果只可以見你一天 我希望係以後o既每一天
如果只可以見你兩天 我希望係白天同晚天
如果只淮我見你三天 可以係昨天今天明天
只淮我見你四天 春天夏天秋天冬天
俾我見到你七日 我希望係星期一到星期日…


強烈建議這首歌拍MV,讓各大麻甩仔在K場苦練其中的「lum女神功」。女主角?唐寧!

大家可能未必知道農夫和at17是差不多同期出道(以首張專輯計),兩年前推介《變變變》的時候,我寫過期待有一天at17可以憑自己的音樂和現場表演風靡萬千樂迷,名正言順地成為「我最喜愛的組合」,結果連我自己也估不到就在那一年at17已經登上這個寶座。就個人觀察而言,07年的農夫論氣勢比05年的at17有過之而無不及,為他們的作品折服或感動或嘻哈大笑的樂迷們,願意再為樂壇創造另一個美好時刻嗎?

註:《學海無涯》的「士多啤梨啤梨蘋果橙」及「Chemistry makes me cry」,取材自Twins《士多啤梨蘋果橙》及《明愛暗戀補習社》。
《全民皆估》的「人人人人無啦啦話呢隻股會升」,取材自軟硬天師《點解要大家笠》。
《樂而忘返》的「將今晚今晚今晚交給我」及「你永遠沒法躲」,取材自羅文《激光中》。
《肉麻無罪》的「你望著我像河看海」,取材自蔡齡齡《細水長流》。

11 則留言:

  1. 《肉麻無罪》果段極品早於網絡已經有流傳..但係估唔到有人講得出口 =]

    回覆刪除
  2. "如果只可以見你一天 我希望係以後o既每一天
    如果只可以見你兩天 我希望係白天同晚天
    如果只淮我見你三天 可以係昨天今天明天
    只淮我見你四天 春天夏天秋天冬天
    俾我見到你七日 我希望係星期一到星期日…"

    呢個CHAIN SMS 抄得好正!!!

    回覆刪除
  3. 「呃呃騙騙大話連連,篇篇封面段段纏綿」係咪石頭記呀?

    成隻碟好軟硬下。

    回覆刪除
  4. at17都係我最鍾意既組合,不過依家多咗農夫呢個勁敵~~

    回覆刪除
  5. 順帶一提,你聽咗Kay既新歌《鍾無艷》未呀?我今日一聽就沉迷咗啦,無計啦,餓咗咁耐,仲要Christopher Chak作曲,加埋林夕既詞........
    好想快d睇你既評論~~

    回覆刪除
  6. 你講得好岩...今日既農夫真係同當年既at17好相似,都係以實力見稱
    呢2個組合根本就我既心中最愛,但係仍然都係偏愛at17多d..xD

    我自己都只一係一個學生,個首學海無涯完全將我上堂既點點滴滴盡寫呀!!

    回覆刪除
  7. 我完全睇唔出農夫有咩實力...佢地1隊扮rap的組合.
    況且我唔覺得佢地值得得到"我最喜愛組合"
    佢地今年的確多左好多人認識..但意見好壞參半,佢地只不過剛剛冒起,點可以得"我最喜愛組合"

    回覆刪除
  8. 我今日終於聽完農夫隻碟啦,首《八無禁忌》笑死我啦:張敬軒其實係黑人?EO2其實得兩個人?《十年人事》的確令人反思----到底香港人做錯d乜?特別要講吓既係《肉麻無罪》,嘩,佢簡直係情歌至尊,雖然真係好骨痺~~可能你係男仔先會起哂雞皮,但我作為一個女仔真係覺得好冧架!!不過我覺得最攞命唔你打出嚟嗰段,而係佢後面嗰句:你問我最期待邊日,我話你聽係我你老婆嗰一日!!!

    回覆刪除
  9. 不過咩係"ar ki mor chi"呀?
    (《肉麻無罪》入面嗰句)

    回覆刪除
  10. ar ki mor chi 係日文既 好舒服
    =.=

    回覆刪除
  11. 要批評o既,好應該了解清楚先o黎出聲:
    1.農夫唔係o係度扮rap,佢地開宗名義已經講明要建立一套具本土特色o既style,因為香港有得鬧o既事物比人地美國歐洲基本就冇得fight,亦無必要盲目跟從。
    2.咩叫"佢地只不過剛剛冒起"???人地出左道7年啦!!!捱o左幾多血汗你又知幾多,唔通要某雙生兒可以繼續"瞓多兩晚"又攞個咩鬼野大獎番o黎就叫好???
    3.人地捱得咁辛苦都係掃左叱吒一個台o既組合獎o者,又唔係四台打低陳奕迅,有冇必要受你呢班人o既咀臉係度指指點點???

    無知o既就上網搵左料先,唔好係度無的放矢!

    回覆刪除