星期五, 12月 28, 2007

永遠懷念李麗蕊暨2007新城勁爆頒獎典禮

老規矩大家都該熟悉了,每年的拆禮物日應該用怎樣的心情來看待勁爆頒獎禮。事不宜遲,經典場面全力回放,WowWowWow WowWowWow WowWowWow WowWowWow WowWowWow WowWowWow WowWowWow!(剛好21個,沒有李麗蕊真不慣呢,頒個「真誠勁爆亞洲跳線歌手大獎」給她安慰一下吧,好歹她也出過碟呢。)

一、 陳柏宇和李克勤、張敬軒一同奪得「演繹大獎」,司儀:「將個台交俾陳柏宇!」…二十秒dead air…後台傳出…「軒仔呀軒仔呀!」…司儀:「我地有請張敬軒!」…陳柏宇黯然下台…

二、 李逸朗和蔣雅文得到合唱歌曲,慢著,以前他們不是以「Don & Mandy」的名義得過組合獎嗎?原來需要時Don & Mandy是一個組合,需要時「李逸朗/蔣雅文」是合唱,那為甚麼《相愛六年》不是鍾欣桐和蔡卓妍合唱啊,撈多一個合唱歌獎嘛。

三、 由於是勁趕頒獎典禮,司儀說話要像急口令一樣,但結果是口誤連連。司儀口誤大全:「生城勁爆」(出現幾次,特別是online仔)「國語戈手」「新程勁爆歌曲」「勁爆歌谷」(勁爆谷?)「新城勁炮」(勁車大炮?)不一而足。台灣歌手也入鄉隨俗,先有舞王羅志祥「多謝煽情電台」,再有教主楊丞琳「多謝生癬電台」,無言。

四、 謝安琪可以說是被誤解最多的女歌手了,除了她直至現時為止作品之中只填了三分一首歌詞但不斷被傳媒寫是「唱作歌手」之外,好日唔唱改編歌的她,《第一天》竟然得到「新城勁爆原創歌曲」,比當年頒給《明日恩典》更不可饒恕。如果謝安琪夠型的話大可以即場踢爆兼拒領,橫豎和那個台結冰看來也沒有甚麼損失,兼贏得樂迷激賞。

五、 先不要理為甚麼王菀之和側田是「創作歌手」,同年出道的張繼聰,和早幾年出道的鄧麗欣是「新一代創作歌手」,因為有更精彩的場面:王菀之得獎,上台一開口:「多謝…多謝…多謝…多謝…」我肯定那不是因為負責音響的人的失誤搞出來的幾重回音,而是…不要說台灣的文宣愛作大了,這是真真正正的「一個被天使親吻過的聲音」呢!

六、 用股票形容歌手加上爛到不行的tag都算了,不過所謂「崩口人忌崩口碗」,用中石油形容側田?中石油近來不是A股由50元跌到30元,H股由20元跌到13元嗎?把黃柏高旗下大將形容為一個多月間市值蒸發三千億美元的蝕本貨?難怪Paco要杯葛了。

七、 劉德華開演唱會沒有去,但新城還是要專人去阻住人家開演唱會頒獎給他。啤梨:「我咁大個仔冇乜機會開過演唱會有四面台ga」,葉生,想四台聯噓乎?

八、 新城勁爆年度歌曲:張敬軒《我的天》!真適合形容大家的反應。為甚麼不是比它流行一百倍的《酷愛》?簡單,因為《酷愛》派台那時新城環球還在結冰,連榜也沒有上。現在要破冰,《我的天》就拿獎了。結果連張敬軒也給搞得不知所措,他唱了甚麼?「…你發覺『派彩賞遍』這地球..」

九、 TVB頒發金曲金獎。曾志偉:「得獎的是…《花落誰家》李克勤!」李克勤上台講完得獎感受之後曾志偉才補回:「咪住,呢首《花落誰家》仲奪得第十首金曲!」曉得分輕重麼?更爆的不是這個,是李克勤之後說:「好多謝TVB,今日我帶黎我新歌《再見演奏廳》,希望你地鍾意。」這情況可能在TVB出現嗎?為甚麼新城會先頒「全球勁爆歌曲」後頒「勁爆歌曲」?又為甚麼S.H.E.《中國話》得獎到場的Ella唱《薔薔》呢?

認真的還是那句:如果勁爆頒獎禮是真正代表香港樂壇的頒獎禮,那麼我們看到的是一個沒有希望的樂壇。再加一句,商台請考慮一月一日晚查禁所有鑼鼓等敲擊樂器,免得某唱片公司歌迷一而再再而三地噪音滋擾全場。要防止這個當然有更一了百了的方法,不過…我覺得容祖兒和鍾舒漫還是值得有獎的。

24 則留言:

  1. Holf Yuen, 終於讀到你寫勁爆的文章,好好睇﹗我亦寫了一篇,風格截然不同,擺明鬧到新城暈得一陣陣,請你盡情品嚐﹗

    《新城當我甚麼?》
    http://hardenprawnegg.blogspot.com/2007/12/blog-post_28.html

    回覆刪除
  2. 真係要佩服你
    你可以睇晒成個頒獎禮
    我聽radio的,
    聽左未夠半個鐘已經頭都大埋
    要等笑位真係好難,
    因為成個頒獎禮都係催眠人
    最搞笑係D歌手唔係睇人地唱歌,
    而係起度睇場刊

    PS:又有個司儀將"卡拉OK"讀成類似"加拉OK".悲哀

    回覆刪除
  3. 你寫啲嘢真係好好笑 XD~

    回覆刪除
  4. 理論上已經唔想再接觸新_既頒獎禮......
    永遠估佢唔到點解咁樣頒獎......
    司儀一大堆爛TAG (有時甚至係爛GAG)
    D歌手都已經唔耐煩,何況係聽眾 / 觀眾......



    P. S. 新浪亦一如以往再度創造「新聞」
    例如將明顯係SHERMAN既相TAG成係FIONA- -
    BLOG主如果查一查的話,可能仲有更多

    回覆刪除
  5. 我次次聽到EEG D鑼鼓都想衝過去打爆佢~!!

    回覆刪除
  6. Salute! Really appreciate you having the tolerance to pay attention to this terrible show every year, and reporting all its punch lines to us! For me, I'll rather kill myself.
    Strongly recommend ALL record companies to boycott it.
    P.S. don't understand why Hins having his collection in year end, quite strange timimg for just months after his new album ...

    回覆刪除
  7. 諷刺得好
    發現這個網有些好文章可以分享
    http://ivanamusic.blogspot.com/

    回覆刪除
  8. 一個只重量而不重質既頒獎禮,每年
    帶給各歌手一個超重既獎座,半分鐘致謝兼唱歌時間,加埋各主持不斷發
    放既超爛唔好笑gag,呢百多個獎項
    代表香港樂壇進步還是退步,當事人
    應該心中有數

    PS:唔知有無人數過今年講左幾多次
    "請留步"同"唔好走住"?

    回覆刪除
  9. 今日新城出左個print ad,用各個歌手當晚得獎既shot砌埋黎做key visual,而句slogan係 - 群英唱好音樂新城獎好樂壇.. 究竟寫嗰個有無忍唔住笑呢.. 自己知自己事,好心咪講到自己咁勁勁勁勁勁勁爆啦,架自己丟囉~

    不過聽聞娛樂台將會消失,大家可能好快無得笑啦~

    回覆刪除
  10. 我想講
    新城打正旗號分豬肉
    講到明話基本上係鼓勵D歌手唱多D好歌
    而唔係要佢地爭呢樣爭果樣
    但狗靈衫只係裝假狗扮專業
    仲死口唔認自己偏幫D歌手(尤其是自己友)
    話自己係最專業0既電台~想死......
    4台當中最假0既一個電台

    同埋新城頒獎禮俾好多機會俾D二三線歌手演出
    等佢地有機會0係其他歌手面前亮下相
    又俾佢地排埋舞咁~~~有獎拎又有得表演
    又唔洗做左成年得個桔
    我支持新城架!!!

    PS 唔代表我覺得新城D獎好正常......

    回覆刪除
  11. 回上一個留言
    如果我係歌手,同新城個獎比較,我寧願接多個商場show
    仲有,我真係唔知乜叫自己友唔自己友,唔通新城同環球響破冰之前都叫自己友?

    回覆刪除
  12. 每年勁爆頒獎禮同好多有關佢既文章都會令我地苦笑同反思,我讚成Holf Yuen既說話:對香港的頒獎禮來說,銜頭起得有多大,假就丟得有多大。全國﹑亞太﹑全球,難怪許志安都係東張西望串新城:「點解唔係我攞全宇宙勁爆男歌手呀?」

    p.s.我認同上一個留言,叱吒d獎起碼比新城嗰d難攞,你睇吓金牌會唔會集體杯葛叱吒頒獎禮??

    回覆刪除
  13. 每年勁爆頒獎禮都係一個笑話。佢唯一的功用只係俾D 2,3,4線歌手亮一亮相拎個獎開心下,and that's it.

    By the way, 點解《無所謂》會由衛詩代領,但勁爆女歌手獎卻會「稍後有專人親自送上獎項」?

    題外話,從網上找來這一段新聞:
    http://news.sina.com.tw/ents/sinacn/cn/2007-12-26/234635193121.shtml

    留意鄧麗欣所獲得的獎項。我相信筆者只是手文之誤(「勁」和「驚」是同音),但是出來的效果卻異常爆笑。

    回覆刪除
  14. 唔知有冇人聽到,一開場果陣個女主持讀"freeze"個名有幾難聽呢?
    仲有,經常唔夠mic用,hotcha一路跳一路唱,一路將支mic遞黎遞去~
    同埋個女司儀講野真係勁勁勁爆難聽....

    另,祝願新城一眾被炒dj早日安息.

    回覆刪除
  15. Riverfish:
    你揾那段新聞實在令我笑到碌地,只可講個記者太勁啦,用內地一句流行語,實在『太有才』啦!

    回覆刪除
  16. 我覺得過份係司儀
    當然明白某d字(歌,新)係困難,ps因為自己都成日讀錯

    但係谷(曲)同炮(爆)好明顯係2個音黎
    做司儀唔應該咁樣讀錯下話...

    回覆刪除
  17. 我無睇到呢年新城頒獎典禮,多得blog主用心節錄笑位, , , , 有趣有趣~~

    and than回應者寫到有內地網手寫「勁」變「驚」...更令我笑到扯蝦~~~ 哈哈哈~~~

    回覆刪除
  18. 你有冇買方大同新碟呀??

    回覆刪除
  19. Agree no more...
    對我黎講, 勁爆同李麗蕊既Wow Wow Wow 係劃上等號架!!!
    我好想訪問下劉華佢地...睇下佢講唔講得出佢地拎到咩獎...
    做頒獎禮做到咁,都真係不如唔好做啦...浪費大家時間...

    回返樓上...903係o係到扮公正專業, 但至少佢頒出黎既獎對我呢o的903 fans黎講, 係實至名歸既, 總好過新城咁胡鬧一通吧?

    ps 網主呢篇勁爆, 掂到爆呀!

    回覆刪除
  20. 李麗蕊wowowow31/12/2007 下午5:22

    請問第五點講王苑之個part係點解? sorry,唔係好明。

    回覆刪除
  21. 本人絕對不是Don & Mandy的Fans
    不過還得替他們澄清一下
    EEG方面從來沒有申明是Don & Mandy是組合
    一向EEG都是以"合作出碟"來解釋是Don & Mandy的存在

    至於他們拿過勁爆組合這回事
    相信跟他們沒有太大關係吧
    看第一天能夠拿取原創歌曲就知道是那方面的疏忽

    如果資料有誤,請多多原諒(資料來自一位朋友的口中)

    事實上也沒必要扯到TWINS上
    免得惹怒TWINS FANS吧
    而且她們一出道就拿組合獎
    是誰也知道她們是組合

    回覆刪除
  22. 都係果句,
    佩服你可以睇晒個Show
    我就真係唔能夠喇!

    未頒我就寫左篇
    http://alexxbb.mysinablog.com/index.php?op=ViewArticle&articleId=922526

    BTW,今年叱吒之悶亦令我寫左一大篇

    回覆刪除
  23. 你睇定聽叱吒?今年叱吒都幾悶,不過都有d興奮同感動位,等住睇你既文章...

    方大同隻碟好正,同樣期待你既comment~

    回覆刪除
  24. 你早前提及的"hotcha變做freeze加2蚊"的笑話我己經係freeze個真人秀chatroom度話左比Sukie知....Sukie佢都話"係喎,OK喎!!"

    回覆刪除